ATERRORÍZANOS

Chega novembro,

tempo de Samaín,

de falar cos defuntos,

de comer castañas

e de escoitar relatos estarrecedores

ao carón do lume dunha lareira,

ou xunto ao radiador.

Anímaste a aterrorizarnos co teu propio relato?

Pois participa no noso:

I Concurso de relatos terroríficos

BASES:

• Organizador do concurso

A organización deste concurso está promovida pola Biblioteca Escolar como parte das actividades de “Fomento da lectura e escritura” dirixidas ao alumnado de  Educación Secundaria.

• Condicións para ser participante:

1. Poderán participar no concurso todas as alumnas e alumnos de Educación Secundaria, quedando excluídos os lectores morosos, é dicir, aqueles que non teña devoltos ou renovados os  libros de préstamo no momento en que comece o concurso.
2. Os traballos poderán ser escritos en lingua galega, castelá, inglesa ou francesa sempre e cando sexan respectadas as normas ortográficas e morfolóxicas de dita lingua.
3. O tema dos relatos será de terror ou misterio.
4. Os textos deben ser orixinais, calquera tipo de copia ou plaxio, de demostrarse, suporá a automática descualificación do seu autor.
5. Os membros do xurado poden deixar o premio deserto.

• Datas de comezo e remate

O concurso comezará o mércores 24 de outubro de 2012 e rematará o venres 23 de novembro.

•  O xurado

O xurado estará composto polos profesores responsables da biblioteca escolar.

• Funcionamento do Concurso

Unha vez redactado o relato debedes depositalo na caixa de correos na entrada da biblioteca ou envialo por correo electrónico á seguinte dirección equipobiblio@gmail.com indicando no asunto: CONCURSO RELATOS TERROR.
O fallo do xurado farase público o venres 30 de novembro.

•  Premios

Haberá un terrorífico premio para cada categoría:

1. 1º e 2º de ESO
2. 3º e 4º de ESO

A entrega dos mesmos terá lugar o venres 30 de novembro na biblioteca.

• Publicación dos relatos gañadores

Os alumnos gañadores aceptan que o seu relato sexa publicado nos soportes que o Equipo da Biblioteca estime oportunos.

Esperamos, arrepiados, os vosos relatos...