CÓMO CAMBIÉ MI VIDA, Agnes Desarthe

Antón Kraszowski vive coa súa avoa non por ser orfo nin por que seus pais marcharan lonxe en busca dun traballo co que poder mantelos.
Os pais de Antón teñen bos traballos e non lles falta de nada. Vive coa avoa porque papá e mamá non teñen tempo de atender a seu fillo.

"No se puede educar a un hijo de forma adecuada cuando uno se toma en serio su
carrera" dicía súa nai chea de razón.

Antón detesta a súa escola e sobre todo ao seu profesor Thierry porque ten un extraño sentido do humor que lle fai divirtirse coa burla constante dos seus alumnos e, en especial de Antón.

Que será o que faga cambiar a vida de Antón?
Un encontro casual cunha profesora de música será o comezo dunha vida nova:

• Antón descubre en si mesmo unhas habilidades que descoñecía,
• atopa unha nova escola na que librarse do profesor Thierry,
• coñece a Perla, unha pequena violonchelista que será a súa mellora amiga e
• o máis importante, da man da súa avoa, fai da música a súa paixón e do piano a súa voz.

Fermosa novela da autora francesa Agnès Desarthe ilustrada por Adrià Fruitós para a editorial Edelvives a través da cal asistimos ao máxico cambio de vida de Antón, seducido case por azar por un mundo que descoñecía pero que acaba sendo a súa paixón.

Un fermoso exemplo para traballar nas aulas a autoestima e a convicción de que cada persoa é especial e está dotada para algunha cousa.

Todos somos excepcionais en algo, o máis difícil é atopalo.

Practicas o e-mailing?

Porque se é así ten boa conta de que non che suceda o que a Berry Blue. Eso de cambiar "u" por "i" pode ter as súas consecuencias, aínda que non sempre teñen por que ser negativas.

Neste caso provocan o inicio dunha aventura para dous personaxes que creo nos acompañarán en máis dunha ocasión: Berry Blue e Pink Muffin.

Unha historia contada vía e-mail, o cal non deixa de ser orixinal.

Pero será esta unha relación só por correo electrónico ou chegarán a coñecerse en persoa? Iso non penso contarcho eu! Terás que descubrilo ti. Pero non te preocupes porque tes o libro a túa enteira disposición na Biblioteca.

Eso si, para pedilo tes que saber que o título desta obra, clasificada como literatura xuvenil romántica, é "Asunto: error de envío" e quen suscribe a autoría da obra son Hortense Ullrich e Joachim Fiedrich .

E para cando remates de ler este primeiro asunto e por si quedas con ganas, que seguro que sí ... podo aventurar que o próximo ASUNTO promete: "Asunto: frenesí amoroso". Xa estás correndo ao diccionario a ver que significa esa palabrota frenesí. Preme no enlace, a ver que pasa:

Promete ou non? Pois veña! Que xa estás tardando! Apunta o título, os autores (que son os mesmos) e mete o papel no buzón do sapo Manolo, para que o merque en canto saia. E por suposto non esquezas ler o 1º asunto.

COMECOCOS 09

ATENCIÓN ALUMNOS DE ESO!

RECORDADES ESTE LOGO?

TODO ESTÁ XA EN MARCHA,

DAREDES A TALLA?

PRESTADE ATENCIÓN AOS TABOLEIROS DA ENTRADA E, SOBRE TODO,

PREPARADE AS VOSAS NEURONAS PARA RENDIR AO 100 %

O PREMIO SERÁ MOOOOOI SUCULENTO!

O CANTO DOS PEIXES, Marcos Calveiro

Marcos Calveiro (xa non firma co S. intermedio) volve a seducirnos na súa última obra editada por SM, O canto dos peixes, que ven de recibir o Premio Barco de Vapor 2008.

Unha historia de perdedores. De novo un vello e un neno, coma en Sari, de novo o mar coma telón de fondo. Pero desta vez non viaxamos no tempo nin no espazo. A cidade na que tentan sobrevivir ambos pode ser calquera das cidades costeiras do noso litoral. Unha cidade na que...

"é imposible ver o sol afundíndose na xerfa do horizonte. Impídeo unha borraxeira xofrada que inza todos o recantos do porto coma os raxos dun polbo pardento."

• Ismael (un vello mariñeiro xubilado), escapa cada día da residencia onde se sinte prisioneiro para visitar o vello peirao de pedra onde permanece a súa dorna enlamada.
• Xacobe distráese xogando entre os desperdicios do asteleiro antes de volver á súa chabola. Xa non vai á escola, ten que axudar a seu pai a recoller ferralla.

Ambos entablan unha fermosa amizade, Ismael añora o pasado, Xacobe non ten esperanzas de futuro. Pero as cousas van cambiar, a maxia dun vello esconxuro fará que...

"todos vexan de novo o sol afundíndose, cachazudo, na xerfa do horizonte."

Unha fermosa lectura para reflexionar sobre o progreso de espaldas á natureza, sobre o respecto polo mar, sobre a amizade por enriba das diferenzas de idade ou condición social.

Unha oportunidade tamén para rescatar do esquecemento o fermosísimo léxico que Calveiro manexa con tanta soltura e que fai da súa prosa inconfundible.

Un fermoso agasallo para o Día do Libro.

SENCILLAMENTE HENRY

Entre as novidades editorais que podedes atopar na biblioteca está Sencillamente Henry, unha novela de Michelle Magorian publicada por Ediciones Oniro, na súa magnífica e coidada colección "La lámpara mágica".

Trátase dunha obra de máis de 600 páxinas, que ten como protagonista a Henry, un rapaz orfo de pai, que non atura ao seu padrastro e soporta como pode á súa pequena irmá Molly. A historia desenvólvese tras a II Guerra Mundial. Henry está triste pola morte do seu pai, considerado por todos un heroe de guerra, e o seu refuxio e diversión é o cine, a súa paixón polas películas é extrema. De maior quere ser camarógrafo, e o descobrimento dunha vella cámara de filmar fará que a súa vida se transforme, pois non sempre a realidade é como aparenta ser.

Recoméndovos esta obra que trata con tenrura e delicadeza temas como a amizade, a soidade, o sentimento de perda, a relación pais-fillos, a guerra, o amor pola fotografía e o cine, as apariencias, a forza de vontade...

Un libro imprescindible que fai rir, pensar e chorar por igual.

CINE, LITERATURA E BIBLIOTECA

A biblioteca rinde homenaxe nestes días de abril a aquelas películas que empregaron coma fonte escrita unha obra literaria.
En colaboración cos distintos departamentos didácticos de ESO (Tecnoloxía, Lingua Galega, Lingua Castelá, Lingua Inglesa, Lingua Francesa, Música e Matemáticas) temos programada unha fermosa actividade na que aprenderemos xuntos o xeito máxico en que a linguaxe cinematográfica convirte un texto imaxinado en imaxes "reais".

Os distintos cursos de ESO traballarán dun xeito interdisciplinar unha película xunto coa obra literaria da que partiu o seu guión.

Abordarán o texto e o film dun xeito crítico e curioso, comprobando como se transforma unha obra escrita en imaxes, como os actores interpretan aos personaxes imaxinados, como escollen os seus creadores a ambientación adecuada, a música, o vestiario...

Os alumnos de 1º de ESO verán El bosque animado, e traballarán o film e algúns fragmentos da obra de Wenceslao Fernández Flórez nas materias de Lingua Española e Ciencias Naturais.

Os de 2º de ESO verán West Side Story, e traballarán a película xunto co Romeo e Xulieta de William Shakespeare nas materias de Lingua Inglesa, Castelá e Música.

Os de 3º de ESO verán A lingua das bolboretas, e traballarán a película xunto co texto de Manuel Rivas Que me queres, amor?, nas materias de Lingua Galega e Tecnoloxía.

Os de 4º de ESO verán Los girasoles ciegos e a traballarán xunto co relato de Alberto Méndez que inspirou a película nas materias de Xeografía e Historia e Lingua Castelá e Literatura.

Agardamos que todos gocedes coas obras seleccionadas, tanto literarias coma cinematográficas, e que vos animedes a comentar neste blog o voso parecer.

Na exposición da biblioteca tedes moitas máis agardando por vós!!!

LUCES, CÁMARA, ACCIÓN!

Queremos dedicar este breve mes de abril ao chamado Séptimo Arte: o cine, e á súa especial relación coa literatura. Na biblioteca temos á vosa disposición unha selección de obras literarias e a súa correspondente adaptación cinematográfica. Atoparedes títulos para todas as idades e gustos: Garfield, Los 4 fantásticos, Azur y Asmar, A lingua das bolboretas, Las trece rosas, O cazador de papaventos, El niño del pijama de rayas e tantas outras.

Aproveitamos esta ocasión para presentarvos o blog DECINE da biblioteca. Podedes visitalo neste enlace. Alí atoparedes información sobre o cine en xeral, a súa historia, a linguaxe cinematográfica, carteis, música, estreas...

AGARDAMOS AS VOSAS VISITAS, COMENTARIOS E SUXESTIÓNS

VACACIÓNS!

Chegou o día, pechamos as portas da biblioteca, apagamos luces e ordenadores, baixamos as persianas. Tempo de paz, penumbra e silencio na escola. Tempo para sair, viaxar, soñar, xogar, sorrir, incluso rezar fóra dela.

FELIZ DESCANSO!

Día do libro Infantil e Xuvenil 2009. Celébrao cun clásico! Celébrao cun cómic!

Hoxe hai 204 anos que naceu Hans Christian Andersen, autor de contos tan famosos e emotivos como "A vendedora de mistos", "O soldadiño de chumbo", "O patiño feo", "A Sereíña" ou "As zapatillas vermellas".

É por iso que a IBBY (Organización Internacional para o Libro Infantil e Xuvenil) decidiu sinalar este día como o Día do Libro Infantil e Xuvenil.

"Eu son o mundo, e o mundo son eu

porque a través dos meus libros

podo ser o que queira.

Palabras e debuxos, prosa e verso

trasládanme a lugares que están

lonxe e preto ao mesmo tempo..."

Así comeza a mensaxe para este día do ano 2009.

Para conmemoralo invítamosvos dende a biblioteca a ler aos clásicos pero dun xeito diferente, a coñecer a heroes da antiga Grecia, tráxicos namoramentos, viles conquistadores de mulleres inocentes, nobles cabaleiros, pícaros criados...

Trátase de adaptacións en forma de cómic desas pezas universais que ás veces parecen espertar unha intolerancia case patolóxica só con ser mencionadas. Lazarillo de Tormes, La Odisea, Don Juan Tenorio, Romeo y Xulieta e Tirante el Blanco son as 5 primeiras entregas desta colección de SM de clásicos en cómic.
5 magníficos ilustradores de sona internacional avalan a calidade desta fermosa colección:



Abraham Pérez Pérez co seu Don Juan Tenorio (adaptado por Begoña Oro).






Enrique Lorenzo co Lazarillo de Tormes (adaptado por el mesmo).






O arxentino Jorge González (autor da galardonada novela gráfica Fueye") con La Odisea de Homero (adaptada por Federico Villalobos)


O galego David Rubín con Romeo e Xulieta (adaptada por Ricardo Gómez)





E finalmente outro ilustrador galego, Miguel Porto, atreveuse con Tirante el Blanco (adaptada por el mesmo).
Historias emocionantes, estilos de ilustración moi diferentes, un placer para os amantes da letra e da imaxe e un reclamo que tal vez esperte o interese por coñecer as GRANDIOSAS obras orixinais nas que se inspiraron.


FELIZ DÍA DO LIBRO INFANTIL A TODOS, aos que loitades pola difusión e dignificación deste xénero literario, aos que posuides a maxia de escribir para nenos, aos que convertides en imaxe historias marabillosas e a todos os PEQUENOS LECTORES (os pequenos en idade e os que o sodes en espírito...) que gozades con cada historia nova que cae nas vosas mans.